OS DANZANTES DO CORPUS EN SÁRRIA
OS DANZANTES DO CORPUS EN SÁRRIA
Xaime Félix López Arias
Até as décadas finais do século XVIII foi costume consagrado que na Festa de Corpus Christi , que era a oficial do Rexemento da vila de Sárria , participasen na procisión que dende San Salvador ía até Santa Mariña , seis danzantes , debidamente caracterizados, que ían facendo os seus puntos de baile diante do palio que acollía ao celebrante portador da custodia.
O custe desta danza , que en realidade debería ser por conta do Rexemento da Vila , corría a cargo da Obra Pía dos Hospitais de Santo Antón Abade e San Lázaro, que tamén pagaba a colocación de flores, fiuncho e espadanas ornando o chan da rúa e varrido previo, isto coa natural satisfación por parte dos rexedores que vían con bos ollos que as fracas arcas municipais non mermasen,.
Os diferentes bispos e visitadores cando tomaban contas aos administradores da Obra Pía insistían unha e outra vez en que todos os fondos se destinasen só á atención dos peregrinos e pasaxeiros pobres , que volvían de Santiago, sempre e cando presentasen a "compostela" e unha e outra vez os munícipes sarriaos seguían a adicar os medios do hospital a esas atencións e a outras , como o sostemento da escola de primeiras letras e da de gramática , xa no remate do século XVIII.
Finalmente as ordes dos bispos foron cumpridas e retirados os reais e maravedises sustraídos das fondos da Obra Pía , que se gardaban na arca de tres chaves, e xa non hai lembranzas de que ese costume se mantiveses por máis tempo.
Nas escasas contas coñecidas , do Rexemento sarriao, referidas aos primeiros anos do século XIX , non hai consignación ningunha para danzantes e é de supoñer que a tradicional danza non se mantería, e non habendo cartos e non habendo paga o costume morrería axiña. Polo que se ve a devoción " a secas " non prestaba.
A Danza do Corpus de Sárria dalgún xeito estaría emparentada coa que aínda se conserva na actualidade na parroquia de San Cristovo da Cervela , e é de imaxinar que unha e outra virían dunha longa tradición secular.
O acompañamento musical corría de conta do Concello que contrataba un gaiteiro , e son coñecidos os nomes de Domingos López ou de Xoán Rivela que entre 1570 e 1612 amenizaron as festas de San Xoán Corpus e as Pascuas.
A tradición de estrar a rúa principal con flores, fiuncho e espadanas tivo mellor sorte , e en cada Corpus ademáis de varrer a rúa , os rapazolos recibían a encomenda de buscaren vexetais para embelecer o chan.
De varios anos para acó , seguindo un criterio artístico , un longo tapiz floral vai desde San Salvador a Santa Mariña , e son moitos os sarriaos e sarriás que colaboran na recollida de flores , follas de buxo e na formación das fermosas alfombras nas que con sucesión temporal Violeta Bernardo e Hernando Caldeiro, entre out ros, aportaron a súa sensibilidade artística para que a celebración da Festa do Cortpo de Cristo alcance un bon suceso e nese labor tamén se pide a colaboración de peregrinos de paso pola vila. Esta nova tradición corre parella co embelecemento floral que se fai noutras vilas galegas.
***************************
Nas décadas finais do século XIX estaba viva en San Xoán de Lòuzara a tradición de facer danza na procisión do Corpus, con bailes de espadas, fitas e outros pasos de vello mantidos .
Na actualidade só os Danzantes da Cervela, na súa Festa de Santa Lucía, manteñen viva a anterga tradición .
Comentarios
Publicar un comentario