AUTO DE BON GOBERNO ( SANTIAGO DE CEDRÓN, 1838 ) (573 )
AUTO DE BON GOBERNO ( SANTIAGO DE CEDRÓN, 1838 ) (573 )
A parroquia de Santiago de Cedrón, na provincia de Lugo, foi Couto señorial no Antigo Réxime , foi cabeza de Concello constitucional en 1822 e dende 1840 ficóu integrada no Concello de Láncara, do partido xudicial de Sárria.
En 1838 o pedáneo da parroquia, posiblemente moi influido polo crego da freguesía , preocupado polo benestar, paz social e saúde espiritual dos seus veciños ditou un auto de bon goberno, tomando riba del unha potestade sancionadora para os casos de incumprimento .
AUTO DE BON GOBERNO
Na Casa de Audiencia deste Couto de Santiago de Cedrón a dous días de febreiro de 1838, o Señor Mordomo Pedáneo , dixo que debía Mandar e manda que os domiciliarios cabezas de casa desta Parroquia se xunten no sitio de Costume para a eleución de depositario de Buldas e feutos reáis e pagas inovadas , repartidores e máis oficios que teñen de costume.
1ª........ Asemade manda que os Pais de familia cabezas de casa coiden e eduquen no santo temor de Deus aos seus fillos, irmáns ou criados e demáis domésticos , que en todos os días e tempo recen o Santo rosario á Virxe santísima.
2ª....... Que ningún veciño deste Couto permita fiandóns na súa casa baixo a Multa de catro ducados pola primeira vez e á segunds o duplo e procederase ao prevenido por reáis ordes.( 1 )
3ª........ Que ningún dos cabezas de Casa permita que saian os seus domésticos pola Noite a parte sospeitosa , baixo a multa de dous ducados e as máis a que se farán responsables e que se tomará providencia.( 2 )
...... Que todos os veciño desta parroquia terán a obriga de varreren e limpar as súas Casas , cainzos e paredes con curiosidade. ( 3 )
...... Que todos os veciños e cada un deles limpen as fontes de todas as silvas, pedras , bulleiro das balloadas , sobor do que en non o verificando procederase a costa dos omisos.
...... Que asemade limpen os Cmiños e rarifiquen e cortes as silveiras deles , baixo da mesma pena do que se farán responsables con arranxo ás reáis ordes.
..... Que ningún arrieiro nin tratante , como asemade as taberneiras, merquen nin vendan pola medida Castelá, senón pola Galega , so pena de tres ducados e dous días de Cárcere pola primeira vez.( 4 )
...... Que ningún dos veciños desta Parroquia permita que os seus domésticos leven lume para o Monte , sen causa lexítima baixo da pena de catro ducados e as máis a que se farán acreedores. ( 5 )
..... Tamén se pon Couto nos Agros , baixo da multa de dous ducados, en que se propasen a introduciren gados Maiores e menores.
....... Asemade ponse Couto nas searas para que as Mulleres non se propasen a colleren herba fora dos seus terreos baixo da pena de dous ducados.
....... E por último encárgaselle a todo fiel cristián vivan no santo temor de Deus, segundo nolo ensina a doutrina cristiá da nosa Santa Nai Igrexa Católica Apostólica e Romana.
Notificación
Na Casa que serve de Audiencia a este Couto, a dous días do mes de febreiro de 1838 o Señor Tenente tendo diante del a todos os cabezas de casa de Este couto, aos que lles lin e notifiquéi o auto e Capítulos que Anteceden para que o teñan entendido e cumpran cada un na parte que lles corresponda, e de enterados dixeron que cumprirán co que se prevé e manda ; e encol do depositario dos efetos reáis nomean a Pedro da Madalena , veciño do Lugar de Sáa e por repartidores a Don Carlos Pardo Escobar . a Domingos López da Cortella, Xoán Fernández Suazo e a Francisco Tallón.
Monteiros
A Xosé Iglesia, Xosé Rigueiro de Arriba, a Domingos López, a Xosé Rei, Aos que dan por concluso este Auto e que cumprirán cada un na parte que lles corresponde e a maior abondamento asinan os que saben. Estando na dita Casa de Audiencia deste Couto.
Xoán Fernández Suazo.- Xosé de Grandas.- Anxo López .- Luis Saco e Quiroga.- Marco Rigueiro.- Domingos Rodríguez.- Xosé Prados.- Domingos Maside.- Manuel Fernández.
***************************+
( 1 ) Fiandón ou Fiada: Xuntanza pola noite de mulleres e mozas fiadeiras nunha das casas da parroquia á que acodía a mocidade e onde con música de gaita , pandeiros ou outros instrumentos sinxelos se facía baile , dicían contos e con sinxelas diversión acompañaban ás que traballaban. Os mozos soían pagar o gasto de alumear a reunión con guizos , candeas ou , coa chegada do petróleo, con candís de gas e tamén de carburo. Estas reunións eran vistas con malos ollos polos párrocos, que moitas veces , sabedores de onde había fiandón, entrban na casa e disolvían o sarao. Algúns deses cregos, máis benévolos, presentábanse no lugar e ali permanecían vixiantes de que a moral non se resentise, e normalmente poñían por condición que toda a concorrenza , antes de iniciar o traballo cos fusos e as rocas , rezase o rosario.
( 2 ) Por "parte sospeitosa " entendían as tabernas ( moitas veces establecidas en lugares lonxe das aldeas razón pola que eran visitadas por irados e xentes de mal vivir ) ou as casas onde vivisen mulleres soas que poidesen ser ocasión "de perdición" para a xente moza, ou para adultos de moral laxa.
( 3 ) A limpeza de casas, cainzos ( quenzos ) e paredes atendía á necesidade de evitar incendios, xa que o sarrio no quenzo e as paredes da lareira era causa de perigosos lumes.
( 4 ) Na parroquia de Santiago de Cedrón, no século XVIII, esixíanlles portaxe aos arrieiros por pasa polo Camiño francés de Viduedo a Lugo ) pola Ponte de Carracedo , no río Neira. A proibición de usar a medida castelá debíase a dar seguridade aos compradores, evitando así que desen o prezo de Castela por vara e entregasen pezas máis curtas , con gaño da diferenza de mensura.
( 5 ) Para levar lume ao monte , caso de non teren isqueiros, soían levar brasas dentro dunha ola. Os pegureiros facían pequenas fogueiras para se quentaren cando levaban o armentío a pacer no monte. Estaba permitido levar braseiro cando se facían rozas nas rebouzas e se preparaba borreas ou tolas. Tamén podían levar braseiro os carboeiros que no monte facían carbón para as ferrarías e fraguas.
Comentarios
Publicar un comentario