A lenda da Virxe en Fafián
A LENDA DA VIRXE EN FAFIÁN
Cando San Xoán e a Virxe María andaban polo mundo, chegaron a Sárria.
Cando San Xoán e a Virxe María andaban polo mundo, chegaron a Sárria.
O Neno tiña sede e Santa María pediulle unha cunquiña de auga a unha vella que limpaba a gra na súa aira.
- Olle , boa muller, ¿ Poderíame dar unha cunquiña de auga para o meu meniño que chora coa sede ?.
A vellota por non deixar de traballar díxolle que non a tiña, e deulle unha códea de pan duro que andaba a roer....
- Segundo dan , así terán,- dixo a Virxe María -,A quen pan dá , dareille pan.
Seguiron andando para a outra beira do río e chegaron a Ribela. Había un home a carón da porta da súa casa e tamén lle pediu unha cunca de auga.....
- E un cento se quere, que temos o río tan perto das casas que afogamos a pouco que chova, o río logo anda máis polas chouzas que pola madre.......Beban canto queiran e collan tamén unhas cereixas para os tres e este molete de pan que agora saíu do forno...
Bebeu a auga o Neno, e tamén San Xoán e a Virxe María , comeron o pan e as cereixas e dixo Santa María:
- Polo aprezo que me dan, auga con xeito terán, e de pan abondarán.
Seguiron camiñando paseniño pola congostra ata que chegaron a Fafián.
Daquela Sárria , Ribela e Fafián estaban en terra de veiga e os camiños andaban por chaos.
O Neno cando chegaron á aldea dixo que tiña sede, e a Virxe petou na porta dun pazo.
Xa era noite, e aínda que lles pedíu e lles rogou que abrisern e lle desen de bebebrr , desde dentro dixéronlles que seguisen camiño, aínda que aos poucos saiu unha meniña que lles deu ás agachadas tres anacos de centeo.
- Quen auga nega, sede teña, quen pan dá seirura terá.
E cando deixaron atrás o lugar, dixo a Virxe :
Sárria e Fafián / auga non terán
e os de Rbela/ han medrar con ela
Sárria e Fafián / a tí meu curmán
por Padrón terán / e de bica en pinguela
levarán a sella.
Á xente de Ribela / auga e máis secura
daranlles seitura, / en pan nadarán
e en seco andarán.
Sárria e Fafián / auga nos pés terán
e bicas e fontes / quedaranlles lonxe
E fixo un sinal, e a terra moveuse e os chaos de Sárria e Ribela empezaron a subir como soben e medran os bolos co formento e o que fora veiga convertiuse en dous outeiro, non moi altos, porque San Xoán aproveitando o padroado, rogoulle a Santa María que non os colgase nun monte alto e iso que a Virxe aínda se fixo rogar...
E así foi como en Sárria nunca faltou pan , porque pasou a ser a vila principal , e aínda que non o sememtaban , os seus habitantes recibían fatrura de tegas de centeo e trigo polos seus traballos ou por rendas. Mais por culpa da vella pouco caridosa quedaron condeados a baixar ata a Fonte Ribeira para poder beber, cociñar e gobernar as casas , porque nin pozos podían lograr.
Os de Ribela, porque o home lles dera pan e auga, quedaron con terras no baixo e terras no teso, e co río alonxado das casas, e así os leiros e searas produciron moito centeo.E como lles deran auga, pan e froita de todo tiveron fartura.
E os de Fafián, pola oculta caridade da meniña, poderon colleitar pan abondoso na costa e na cha . E foron escasos de auga, aínda que non tanto como os de Sárria.
E así se explica que o lugar de Ribela tivese prados vizosos e boas centeeiras porque ao arredarlles o río quedoulles unha boa veiga, e as terras de fafián e as de Sárria que foran veiga foron convertifdas en cuiñas de sequeiros.
E aínda grazas a que San Xoán pediu polos lugares onde hoxe é Padrón, que senón igual quedabana no curuto dunha serra.
( Recollida e recreada por Xaime Félix López Arias )
................................Publicada no Libro-Programa das Festas do San Xoán, 2000...............................
Comentarios
Publicar un comentario