A lenda de Castelo dos Infantes
A LENDA DE CASTELO DOS INFANTES
Na aldea de Castelo dos Infantes , moi perto da vila de Sárria, houbo hai moito tempo un Señor que casou cunha muller moi fermosa.
Na aldea de Castelo dos Infantes , moi perto da vila de Sárria, houbo hai moito tempo un Señor que casou cunha muller moi fermosa.
Levaban xa varios anos casados e non tiña fillo ningún. Cando xa desesperaban de ter descendencia a Señora caeu preñada e en ocasión de que o marido estaba nas Terras de Fora , loitando cos mouros, paríu sete varóns, todos eles cuspidiños ao pai.
Tendo por grande deshonra un parto de tantos meniños, e que a podesen considerar muller de mala vida ou de ter pauto co Demo, chamou a un servo de moita confianza e encomendoulle que collese a seis daqueles recen nados e, como era tempo de invernía, e o río Sárria tiña unha grande enchenta os tirase á auga dende a ponte de Barxelas.
Coidaba que así ocultaba o que ela pensaba ser unha deshonra.
O labrego , que era home de grande corazón, non foi quen de se desfacer dos pequenos e ocultounos na casa e despois de ir ao castelo para comunicarlle á Señora que xa fixera o mandado, aquela mesma noite saíu cara as montañas lonxanas onde tiñan uns seus parentes, e encomendoulles que criasen aos neniños, que xa el os iría recompensando e axudando para sacalos adiante.
Voltou da guerra o Señor e levou unha grande alegría cando viu que xa tiña un herdeiro loiro e forte que prometía chegar a ser alto e ben disposto como el mesmo.
Pasaron os anos , e cando o rapaz xa se fixo grande, e era todo un cabaleiriño , tratou o pai de facer unha grande festa á que cocorrerían os Condes da terra e os fidalgos de varias légoas á redonda, e para que a festa fose sonadaa matinou ir de caza ás montañas para xuntar moitos xabaríns e rebezos para o convite,
Para aló saiu acompañado dos monteiros e dos seus homes de armas, pasando moitas horas no monte adicados á caza.
Apareceu unha forte treboada e para non se mollar el e os seus homes entraron nunha palloza onde foron acollidos con moita habilidade polos alí moradores.
Grande sorpresa tiveron todo cando á hora do xantar, rematada a treboada , apareceron seis rapaces que baixaban da serra onde, polas faces mouras ben se lles notaba, estiveran a facer carbón. Eran todos eles de cabelos loiros e despois de se lavaren todos poideron ollar que todos seis eran igualiños ao fillo do Señor, que ficara en Castelo.
Marabillado, o Señor de Castelo preguntoulle a aquela xente como podía ser que sendo os pais pequenos e de pelo negro, aqueles rapaces foran tan altos e de cabelo loiro.
Temendo que ocultar o que sabían fose pior para eles, marido e muller contáronlle reservadamente ao Señor como un seu parnte que tiñan en terra de Sárria, vinte anos atrás lles trouxera aqueles meniños que mesmo collían nun queipo e sen dar explicación ningunha lles pedira que os coidasen , que non lles había faltar de nada para a crianza , como así fora, que boas moedas e roupas lles fora traendo ano tras ano, e os rapaces tíñano por seu padriño, que por tal os levara a bautismar á igrexa ata que cando eles eran mozos rexos , e xa axudaban ao home no seu traballo de carboeiro, el mesmo lle dixera que non precisaban de máis axuda, e aínda así, sempre pola Pascua, de noite para que ninguén o vise , o parente viña para saber como estaban os rapazolos e nunca deixou de levarlles as acostumadas moedas. E que iso era todo o que podían dicir , e que aínda que ás veces tiveran a tentación de pedirlle que lles dera unha explicación daquela mea misteriosa, non ousaran facelo , e que como todo s os tiñan por fillos deles e eran o amparo na súa vellez, preferíran non saber nada de nada.
O Señor quedou asombrado e, dándolles en segredo e sen vista de homes varias moedas de ouro, arrincoulles o nome do seu parente, que non era outro que o máis fiel dos seus servos que, xa moi velliño, andaba sempre o seu herdeiro como aio e confidente.
Regresaron a Castelo. O Señor falou co criado e este confesoulle como pasara todo.Calou o Señor. Co pretexto de cazar algunhas pezas máis voltou á montaña, e de aló trouxo ás escondidas aos seis rapaces despois de contarlles a eles e a quen eles crían que eran os seus pais , a verdade do conto.
Baixo severas ordes tívoos agachados en Mendrós na casa do seu bon, criado e seguiu preparando a festa, con cara alegre e sen que ninguén sospeitase cousa dos seus verdadeiros sentimentos.
Baixou á vila para que un alfaiate lle fixese un fermoso traxe ao herdeiro e encargoulle outros seis iguais, sen explicarlle a razón, e mesmo o xastre non quixo preguntar nada, porque podía perder o gaño se facía preguntas parvas ou indiscretas.
Chegou o día do grande banquete, presidido polo Señor e a Señora, festa na que estaban varios condes e unha lucida compaña de fidalgos, donas , monxes e cregos.
Sonou a música de gaitas e zanfonas e de súpeto abríuse a porta da sala e entrou o herdeiro, seguido dos seus seis irmáns, todos igualiños e vestidos con roupa da mesma feitura.
¡ Daba xenio velos !
A dona do castelo, cando viu descoberta a súa vilanía, sentíu un forte afogo no peito e, diante de todos, caeu morta, sen dar tempo a que o Abade de Samos, que estaba ao seu carón, puidera darlle a absolución.
Polo que conta esta historia , aínda hoxe, moitas persoas chámanlle a aldea, que está riba
dun outeiro, Castelo dos Sete Infantes.
E tamén contan que o castelo era tan alto, forte e soberbo que a súa sombra chegaba ata a vila de Sárria.
( Recollida darredor de 1960 por Xaime Félix López Arias )
Comentarios
Publicar un comentario