PARADELA : RELACION DE BENS DE ALONSO LÓPEZ DA PENA DE MIRALLOS ( 1789 ) (762 )

 PARADELA : RELACIÓN DE BENS DE ALONSO LÓPEZ DA PENA DE MIRALLOS ( 1789 )

                  ( 762 )                                                                  Xaime Félix López Arias 

Na parroquia de Santa María de Ferreiros, que pertencía á Encomenda de Portomarín da Orde de San Xoán do Hospital de Xerusalén  ( Orde de Malta  ), no lugar da Pena de Mirallos,  beira do Camiño de Santiago, e perto  do fito que sinala  a distancia dos 100 quilómetros   a Santiago de Compostela,  está a CASA DE ALONSO.

No ano 1789 , Alonso López,  foreiro  de casa e bens pola Encomenda de San Xoán de Portomarín , seguindo o mandado por unha instrución  real ,  deu a seguinte relación:

" RELACIÓN  de ALONSO LÓPEZ , veciño do lugar da PENA ,frguesía  de Santa María de FERREIROS,  dada  á Súa Mercé o Señor Alcalde  Maior de San Nicolau de Portomarín e os seus agregados do que contén  a Real Instrución, como segue. "

1ª,.  Primeiramente  consume de CARNES   un leitón cebado,  o seu peso  vinte e catro libras  aberto, cada libra un real.

2ª,.  Non consumo VIÑO,  por non poder. 

3ª,.  Tampouco dá razón de VINAGRE

4ª.-  Tampouco de ACEITE ,  tampouco dou razón   dos de SEBO, BACALLAU  , por non consumilo , nin ser do meu uso.

5ª,.  Consumo unha libra de XABRÓN , o seu prezo catro reais,  que  esta cómpraa polas feiraa de afora por non haber  fábrica neste pobo.

6ª.-  Non consumo XÉNEROS  EXTRANXEIROS   nos seus vestiarios  nin tampouco nos da súa familia.

7ª,.  Non dou razón  á Súa Maxestade  nin a outro Señor  do que contén  a sétima relación , se non é que sexa  LENZO e ESTOPA , que consumirei  vinte varas,  o seu prezo a dous  reais e medio a estopa, o lenzo a tres reais e medio.

8ª,-  Á oitava  non dou razón  de venda de GRA  nin SEMENTES , por non habelos.

9ª.-  Tampouco vendo LA  algunha pois a  pouca que teño  consúmoa co vestiario da miña familia.

10ª.-  Non teño de que dar  razón algunha en orde ao que  se explica  na décima pregunta  á instrución.

11ª.- Á once pregunta, sempre fun e son labrego do estado chao.

12ª.-  Á  duodécima pregunta non poido dar razón da GRA  e SEMENTES  do ano de 49, só si dos que collín ao de presente :

CENTEO:  20 fanegas a 22 reais....022. MILLO: 2 ferrados  a 8 reais........ 8. CASTAÑAS :  4 ferrados...,4 ,. CEBADA BRANCA ;  2  ferrados...... 2 .   LIÑO EN RAMA :  2 arrobas, HERBA SECA :  medio carro , o seu prezo 11 reais,  NABOS : un carro , o seu preso 8 reais. 

Non dou razón  doutra especie de froito, teño  DUAS VACAS de arada que valen 300 reais as dúas. 

Máis teño  DÚAS OVELLAS , o seu valor cada unha 8 reais  que son 16 reais.

Pago de tributos á Súa Maxestade  22 reais e medio.

Págolle de  RENDA  6 fanegas de pan centeo  á Encomeda e  6 reais á dita Encomenda.

Págolle  10 ferrados de centeo  a Don Xosé........,  veciño do lugar de Castrelo, freguesía  de  Santiago da Laxe.

Págolle  2 ferrados e medio a Xoán Toirán , veciño do dito lugar.

Págolle  4 ferrados de centeo  á igrexa de Gonrame.

Págolle  outra fanega  ao Señor de Pol,  de centeo de renda,

Págolle outros 2 ferrados  ao lugar de Vilarbasín.

Págolle  1 ferrado de primicia  á igrexa de Santa María de Ferreiros.

Págolle medio ferrado   de centeo ao Apóstolo Santiago, de VODO.

                              .....................................................

Son casado,  idade de 39 anos,  a miña muller  de 34 anos , o meu pai idade 81 anos, a miña nai  idade de 70 anos; teño dúas irmás , unha de 32 anos, a outra idade de 30 anos. Teño dúas fillas, unha de 4 anos e a outra idade de 2.

E  por non saber asinar  rógolle a unha testemuña  que o faga ao seu rogo  a 7 días  do mes de outubro   de 1789, que o  foi XOÁN LÓPEZ.

                           ........................................................................

Os bens da CASA DE ALONSO   formaban parte do FORAL DE MIRALLOS , do direito dominio da Encomenda de Porrtomarín : 

As estremas deste Foral eran as seguintes:  Principiando na Pena do Pico, seguía  á Pena dos Leiros da Cruz,  de alí ía á Fonte de Mirallos, e pasando  pola Pena do Castro ía até o Muiño  da Parede , e polo Agro do Silveiro  e o Escambrón   do Chao da Reboira  alcanzaba o Valado do Tercio. Dende alí  xiraba en dereitura  á Fonte do Carril  e seguindo  cara o Muiño Vello chegaba á Pena do Pico primeira demarcación.

                                        ................................................................  

NOTA.-  O último posuidor da CASA DE ALONSO da Pena de Mirallos que levou o apelido  " López" foi Xosé López López ( " Pepe de Alonso" ), casado coa miña tía  Xosefa Arias López, que foron sucedios pola miña curmá Ermitas López Arias, falecida  en 2025 ,   quedando   a  casa e bens  sen  destino agropecuario por cesamento  da actividade, pois o seu herdeiro   reside  lonxe do lugar, adicado a actividade por conta allea.

.....................................................................................................................................................................